Minisiteri y’ubuzima yatangaje ko nubwo virusi ya Marburg ikira, hari bimwe mu bice ivamo itinze birimo amatembabuzi y’imbere mu jisho, amasohoro n’amashereka, ku buryo virusi ishobora kusigaramo mu gihe kirekire gishobora kurenga n’umwaka wose.
Ibinyujije mu butumwa bwatambutse ku rubuga rwa x.com yavuze ko abakize Marburg basabwa kwirinda imibonano mpuzabitsina idakingiye, kujugunya agakingirizo ahantu hashyira abandi mu kaga ko kwandura no konsa umwana.
Ibi bikaba bigomba kubahirizwa kugeza igihe ibipimo byo kwa muganga bizemeza burundu ko nta virus iya Marburg ikiri muri ibyo bice.
Umukozi muri Minisiteri y’Ubuzima mu Rwanda (Minisante), Dr. Nkeshimana Menelas, mu kiganiro “Waramutse Rwanda” cyatambutse kuri Televisiyo y’u Rwanda mu gitondo cyo kuri uyu wa gatanu tariki 01 Ugushyingo 2024, yavuze ko ko nubwo iyi virusi yagaragara muri ibyo bice, ntibiba bivuze ko umuntu arwaye, afite umubiri, azahaye, umuntu aba ameze nk’abandi bose.
Dr. Nkeshimana yagize ati” Nka virusi ishobora gusigara mu jisho mo imbere, ubwo ntabwo ari mu marira, ishobora kwandura. Icyo gihe twitwararika iyo umuntu azajya kwa muganga kwivuza amaso bikazasaba ko bamubaga ijisho, muganga aritwararika. Ahandi ni mu masohoro ku bagabo; na bwo aba ari aho agenda ameze neza ariko mu masohoro ye habamo virusi ishobora kwandura.”
Dr. Nkeshimana Menelas yakomeje avuga ko abayikize bafashwa kwitwararika kugeza igihe ibipimo byo kwa muganga bizemeza burundu ko nta virus ya Marburg ikiri muri ibyo bice.
Yagize ati “Ibyo rero bivuze ko ibyiciro by’abo bantu basabwa kwitwararika. Natwe tubasaba kugira isuku mu mibonano mpuzabitsina bagakoresha agakingirizo cyane cyane bari kumwe n’abo bashakanye, no kujugunya agakingirizo bigakorwa mu buryo bwajyenwe n’isuku ikwiye”.
Dr. Nkeshimana avuga kandi ko aya makuru bayatanga ku barwayi bakize virus iya Marburg.
Ati”Turayatanga buriya ni na yo mpamvu n’iyo bataha tubabwira ko tuzakomeza kuba turi kumwe umwaka wose icyo twita follow up clinical check y’abantu bakize Marburg. Babyitwayemo neza sinavuga ko kwanduza byoroshye, ariko ni abantu dukurikiranira hafi. Buri cyumweru turahamagarana ndetse kubakurikirana tuzabikora umwaka wose”.
Kugeza ubu imibare ya Minisiteri y’Ubuzima iheruka gutangazwa tariki 31 Ukuboza 2024 igaragaza ko mu bipimo 6099 byafashwe abantu 66 banduye virusi ya Marburg, muri bo abakize akaba ari 49. Abandi 15 bo yarabahitanye, mu gihe abakivurwa ari 2.
Iyi Minisiteri ikaba itangaza ko guhera ku uyu wa 1 Ugushyingo 2024, amakuru mashya ajyanye nuko virusi ya Marburg azajya atangazwa buri cyumweru.
